1.1. ທີ່​ຕັ້ງ ​ແລະ ປະຫວັດ​ຄວາມ​ເປັນ​ມາ

ແຫຼ່ງທ່ອງທ່ຽວທຳມະຊາດຖ້ຳພູຜາສາດນ້ຳມາຍ ຕັ້ງຢູ່ ບ້ານທ່າຫຼວງ ເມືອງວຽງພູຄາ ແຂວງຫຼວງນ້ຳທາ, ໄລຍະທາງຫ່າງຈາກເທດສະບານເມືອງໄປທາງທິດຕາເວັນຕົກສຽງໃຕ້ ບົນເສັ້ນທາງເລກທີ NR1530 (ເສັ້ນທາງເມືອງວຽງພູຄາ ຫາ ເມືອງລອງ) ປະມານ 20 ກິໂລແມັດ ແລະ ຫ່າງຈາກເສັ້ນທາງປະມານ 200 ແມັດ, ເໜືອຕິດກັບ ບ້ານຕາແລງ (ຊົນເຜົ່າອາຄາ), ທິດໃຕ້ຕິດກັບປ່າສະຫວງນຂອງເມືອງ, ທິດຕາເວັນອອກຕິດກັບ ບ້ານທ່າຫຼວງ (ຊົນເຜົ່າມົ້ງ), ທິດ​ຕາ​ເວັນ​ຕົກຕິດກັບສາຍນ້ຳມາຍ.

ຖ້ຳຈາກການສອບຖາມປະຊາຊົນ ແລະ ຜູ້ທີ່ພົບເຫັນສະຖານທີ່ດັ່ງກ່າວໄດ້ໃຫ້ຂໍ້ມູນເບື້ອງຕົ້ນວ່າ: ຖ້ຳພູຜາສາດນ້ຳມາຍ ເປັນໜ່ວຍພູໜ່ວຍດຽວ ທີ່ມີອຸມົງຍາວ 5 ສາຍ ແລະ ບໍ່ເຊື່ອມຕໍ່ກັນຄື:

- ສາຍທີ 1 ເອີ້ນວ່າ: ຖໍ້ານໍ້າລອດ, ເປັນຖໍ້າທີ່ມີນໍ້າໄຫຼໃນຊ່ວງລະດູຝົນ ແລະ ຈະແຫ້ງໃນລະດູແລ້ງ, ມີທາງເຂົ້າ ແລະທາງອອກ ໃຊ້ເວລາຍ່າງໃນຖ້ຳປະມານ 2 ຊົ່ວໂມງປາຍ, ຫ່າງຈາກເສັ້ນທາງ ປະມານ 200 ແມັດ.

- ສາຍທີ 2 ເອີ້ນວ່າ: ຖ້ຳຜາສາດ, ເປັນຖ້ຳທີ່ກ່າວຂານກັນມາວ່າ ເຄີຍໃຊ້ເປັນສະຖານທີ່ ເຝິກແອບຄາຖາຕາມຄວາມເຊື່ອຂອງຄົນບູຮານ (ໃຊ້ເວລາຍ່າງໃນຖ້ຳປະມານ 1 ຊົ່ວໂມງ ແລະ ຫ່າງຈາກຖ້ຳນ້ຳລອດຍ່າງຂຶ້ນຕາມສັນພູ ປະມານ 30 ນາທີ).

- ສາຍທີ 3 ເອີ້ນວ່າ: ຖ້ຳຍອດຊາຍ, ເປັນຊື່ເອີ້ນຕາມ ທຳມະຊາດປັ້ນແຕ່ງໃນຖ້ຳ ທີ່ມີລັກສະນະຄ້າຍຄືກັບອະໄວຍະວະຂອງເພດຊາຍ, (ໃຊ້ເວລາຍ່າງໃນຖ້ຳປະມານ 1 ຊົ່ວໂມງ ແລະ ຫ່າງຈາກຖ້ຳນ້ຳລອດຍ່າງຂຶ້ນຕາມສັນພູ ປະມານ 15 ນາທີ).

- ສາຍທີ 4 ເອີ້ນວ່າ: ຖ້ຳເຈຍ, ເປັນຖ້ຳທີ່ມີຝູງເຈຍອາໄສຢູ່ເປັນຈຳນວນຫຼວງຫຼາຍ (ໃຊ້ເວລາຍ່າງໃນຖ້ຳ ປະມານ 1 ຊົ່ວໂມງ ແລະ ຫ່າງຈາກຖ້ຳນ້ຳລອດຍ່າງຂຶ້ນຕາມສັນພູ ປະມານ 15 ນາທີ).

- ສາຍທີ 5: ເປັນຖ້ຳທີ່ມີອຸມົງສູງຊັນ, ເລິກ ຍັງບໍ່ເຄີຍມີປະຊາຊົນຄົນໃດລົງໄປໄດ້ເທື່ອ (ບໍ່ມີຂໍ້ມູນ).

1.1. ຈຸດ​ພິ​ເສດ

ແຫຼ່ງທ່ອງທ່ຽວທຳມະຊາດຖ້ຳພູຜາສາດນ້ຳມາຍ ແມ່ນມໍລະດົກວັດທະນະທຳ-ທຳມະຊາດ ທີ່ມີຄຸນຄ່າແຫ່ງໜຶ່ງຂອງ ເມືອງວຽງພູຄາ ແຂວງຫຼວງນ້ຳທາ ເກີດມີມາໄດ້ຫຼາຍປີແລ້ວ, ພື້ນສັນພູມີປ່າໄມ້ດົກໜາຂຽວງາມ, ມີຄວາມອຸດົມສົມບູນໄປດ້ວຍຊີວະນາໆພັນ. ເປັນຊັບພະຍາກອນການທ່ອງທ່ຽວທາງທຳມະຊາດ ແລະ ວັດທະນະທຳຂອງບັນດາເຜົ່າ ເຊິ່ງນອນຢູ່ບໍລິເວນປ່າສະຫງວນຂອງບ້ານ, ບໍລິເວນໃກ້ຄຽງ ລຽບຕາມເສັ້ນທາງມີບ້ານຊົນເຜົ່າອາໄສຢູ່, ເຊິ່ງສາມາດຈັດເປັນກິດຈະກຳການທ່ອງທ່ຽວເຊື່ອມຕໍ່ທາງດ້ານວັດທະນະທຳ ແລະ ທຳມະຊາດໄດ້.

1.2. ທ່າ​ແຮງ

- ດ້ານ​ເສດຖະກິດ: ​​ເປັນ​ເຂດ​ທີ່​ຍັງ​ຄົງ​ຮັກສາ​​ໄດ້​ວິຖີ​ຊີວິດ​ແບບ​ດັ້ງ​ເດີມ, ດໍາລົງ​ຊີ​ວິດ​ແບບ​ອາ​ໄສ​ທໍາ​ມະ​ຊາດ​ເປັນ​ເຄື່ອງມືທໍາມາຫາກິນ ຫາເຄື່ອງປ່າຂອງດົງເພື່ອກິນເພື່ອຂາຍ. ປະຊາຊົນ​ສ່ວນຫຼາຍຈະ​ຍຶດຖື​ອາ​ຊີບ​ແບບ​ຊາວ​ກະ​ສິກ​ອນປູກຝັງ-ລ້ຽງສັດ​ຕາມ​ລະດູ​ການ ແລະ ອາໄສ.

- ດ້ານວັດທະນະ​ທໍາ-ສັງຄົມ: ​ເຂດ​ຖໍ້າ​ພູຜາ​ສາດ​ນໍ້າ​ມາຍ​ເປັນ​ເຂດ​ທີ່​ດໍາລົງ​ຊີວິດ​ໂດຍ​ຊົນ​ເຜົ່າ​ມົ້ງ ມີ​ການ​ດໍາລົງ​ຊີວິດ, ການ​ນຸ່ງ​ຖື, ການ​ປາກ​ເວົ້າ​ທີ່​ເປັນ​ເອກະລັກ​ສະ​ເພາະ​ເຜົ່າ. ນອກ​ນັ້ນ ຍັງ​ເປັນ​ບ້ານ​ທີ່​ໄດ້​ຮັບ​ການ​ພັດທະນາ​ໃຫ້​ມີ​ໂຮງຮຽນປະຖົມ, ມີ​ລະບົບ​ນໍ້າ​ລິນ, ມີ​ລະບົບ​ໄຟຟ້າ ​ແລະ ອຶ່ນໆ.

- ດ້ານ​ທໍາ​ມະ​ຊາດ: ຖໍ້າ​ພູຜາ​ສາດ​ນໍ້າ​ມາຍເປັນເຂດທີ່ຖືກປົກຄຸມດ້ວຍທໍາມະຊາດທີ່ອຸດົມສົມບູນທີ່ນອນໃນປ່າສະຫງວນແຫ່ງຊາດນໍ້າຫ້າທີ່ເປັນມໍລະດົກຂອງແຂວງຫຼວງນໍ້າທາ​ເຊັ່ນ​ດຽວກັນ, ທີ່ໄດ້ຮັບຄວາມນິຍົມຊົມຊອບຈາກນັກທ່ອງທ່ຽວສາກົນທີ່ເດີນທາງມາຢ້ຽມຢາມ, ທ່ຽວຊົມປ່າໄມ້ໃຫຍ່, ຕັ້ງແຄ້ມນອນປ່າ, ຍ່າງປ່າ...